စင်ကာပူ Bugatti အရောင်းပြခန်း Bugatti ၄ စီး ရောင်းချနိုင်ခဲ့

၂၀၂၁ ဩဂုတ်လမှာ စင်ကာပူမှာ စတင်ဖွင့်လှစ်ခဲ့တဲ့ Bugatti အရောင်းပြခန်း ဖွင့်လှစ်ခဲ့တဲ့Bugatti Singapore က ယခုနှစ်အတွင်း Bugatti ၄ စီး ရောင်းချနိုင်ခဲ့ကြောင်း ၊ စင်ကာပူဒေါ်လာ ၂၅ သန်းဖိုး ရောင်းချနိုင်ခဲ့ခြင်းဖြစ်ကြောင်း ပြောကြားပါတယ်။
Bugatti Singapore အတွက် ပြခန်းအသစ်က ၂၀၂၁ မှာ ရောင်းအား ၄ ဆ တိုးဖို့ အထောက်အကူ ပေးခဲ့ပါတယ်။ အကြမ်း အသားတင်ဝင်ငွေ ဂဏန်း ရှစ်လုံး ရစေခဲ့ပါတယ်။
ရောင်းချခဲ့တဲ့ Bugatti တစ်စီး တန်ဖိုးက ယူရို ၄ သန်းဝန်းကျင် (စင်ဒေါ်လာ ၆.၂ သန်း) ဖြစ်ပြီး ကား ၄ စီးအတွက် ရောင်းရငွေ စင်ဒေါ်လာ ၂၄.၈ သန်း ရရှိခဲ့ပါတယ်။

Bugatti ၄ စီး ဝယ်ယူသူတွေဟာ ဒေသတွင်းမှ ဖြစ်ကြောင်း အသိပေး ပြောကြား‌ပေမဲ့ နိုင်ငံအမည်တွေကို ထုတ်ဖော်ပြောကြားခြင်း မပြုပါဘူး။ Bugatti ကားမော်ဒယ်တွေကိုလည်း ဖွင့်ဟပြောကြားခြင်း မပြုပါဘူး။

Bugatti အရောင်းပြခန်းကို စင်ကာပူမှာ ကားရောင်းလုပ်ငန်း Wearnes Automotive က ဒေသအတွက် ဩဂုတ်လမှာ ဖွင့်လှစ်ခဲ့ပါတယ်။ အရောင်းပြခန်း ဖွင့်လှစ်ပြီးတဲ့နောက်မှာ ရောင်းအား မြင့်တက်ခဲ့တယ်လို့ Bugatti Singapore က ပြောကြားပါတယ်။ 

အရောင်းပြခန်း မဖွင့်ရသေးခင် ၂၀၂၀ ခုနှစ်မှာ Bugatti တစ်စီး ရောင်းချခဲ့ရပါတယ်။
ယခုနှစ်မှာ ယခင်နှစ်ထက် စီးရေ ၄ ဆ ပိုရောင်းရတာ ဖြစ်ပါတယ်။ 

ဒေသတွင်းမှာ ပြခန်းဖွင့်လှစ်တဲ့ အကျိုးကျေးဇူးကြောင့် ရောင်းအားတက်တာလို့ ယူဆနိုင်ပါတယ်။ နောက်ထပ် အကြောင်းတစ်ချက်ကတော့ လက်ရှိ ရောင်းချနေတဲ့ ကားတွေက Bugatti ဓာတ်ဆီအင်ဂျင်ကား နောက်ဆုံးအသုတ် ဖြစ်နိုင်တာကလည်း အကြောင်းတစ်ချက် ဖြစ်ကောင်းဖြစ်နိုင်ပါတယ်။

၂၀၂၁ ဇူလိုင်လမှာ Bugatti ကို ပိုင်ဆိုင်တဲ့ Volkswagen Group က Rimac နဲ့ Porsche တို့ ထူထောင်တဲ့ ဖက်စပ်လုပ်ငန်းရဲ့ လက်ထဲသို့ လွှဲပြောင်းခဲ့ပါတယ်။

ခရိုရေးရှားမှ လျှပ်စစ်မော်တော်ယာဉ် နည်းပညာလုပ်ငန်း Rimac ပါဝင်လာတဲ့အတွက် Bugatti ဟိုက်ပါကားကို အီးဗီအဖြစ် ထုတ်လုပ်လိမ့်မယ်လို့ ယူဆကြပါတယ်။
ဖက်စပ်လုပ်ငန်းကို Bugatti Rimac အမည်ဖြင့် ထူထောင်ပါတယ်။
ဖက်စပ်လုပ်ငန်း သဘောတူညီချက်အရ Bugatti ကို Rimac က ၅၅% ပိုင်ဆိုင်ပြီး Porsche က ၄၅% ပိုင်ဆိုင်ပါတယ်။
 Bugatti ကို လက်ရှိလုပ်ကိုင်နေတဲ့ VW Group က Rimac မှာ ၂၄% ပိုင်ဆိုင်ပါတယ်။ 
 Volkswagen Group က Porsche ရဲ့ မိခင် လုပ်ငန်းစု ဖြစ်ပါတယ်။
ဒီတော့ တစ်ဆင့်ခံအဖြစ် Bugatti Rimac ရဲ့ ရှယ်ယာအများစုကို  Volkswagen Group က ပိုင်ဆိုင်ထားပါတယ်။ 
 
Bugatti Rimac ရဲ့ ရုံးချုပ်ကို  ခရိုရေးရှားနိုင်ငံ ဇာဂရက်မြို့မှာ တည်ရှိတဲ့ Rimac ရဲ့ ပရဝုဏ်ဝင်းကျယ်ထဲမှာ ထားရှိမှာ ဖြစ်ပါတယ်။
  Rimac ကို ထူထောင်သူနဲ့ စီအီးအို Mate Rimac က ဖက်စပ်လုပ်ငန်းရဲ့ စီအီးအို တာဝန်ကိုပါ ပူးတွဲထမ်းဆောင်မှာ ဖြစ်ပါတယ်။
Bugatti  ကားတွေ ထုတ်လုပ်မှုကိုတော့  ပြင်သစ်နိုင်ငံမှ လက်ရှိသုံးစွဲနေတဲ့ Bugatti  ကားစက်ရုံကို ဆက်လက်အသုံးပြုသွားမှာ ဖြစ်ပါတယ်။ 
တကယ်လို့ Bugatti က အီးဗီအဖြစ်သို့ ကူးပြောင်းခဲ့ရင် ယခုအခါ နောက်ဆုံး ထုတ်လုပ်ထားတဲ့ မော်ဒယ် Chiron ဟာ Bugatti  ဓာတ်ဆီအင်ဂျင်ကား နောက်ဆုံးအသုတ် ဖြစ်ပါလိမ့်မယ်။ နောက်နောင် ဝယ်လို့ မရနိုင်တော့တာကြောင့် ဟိုက်ပါကား စုဆောင်းသူတွေအတွက် ရှားပါးတန်ဖိုးတစ်ရပ် ရရှိကြမှာ ဖြစ်ပါတယ်။ 

ဆက်စပ်ဖတ်ရှုရန် ခေါင်းစဉ်ငယ်ကို ထိပါ
စင်ကာပူလမ်းတွေပေါ် မောင်းခွင့်မရှိတဲ့ Bugatti အရောင်းပြခန်း စင်ကာပူမှာ ဖွင့်လှစ်