ပြည်တွင်းမှ နိုင်ငံတကာကားကုမ္ပဏီများ အားလုံးနီးပါး ထုတ်လုပ်မှု ရပ်ဆိုင်း

ပြည်တွင်းမှ နိုင်ငံတကာကားကုမ္ပဏီများ အားလုံးနီးပါး ထုတ်လုပ်မှု ရပ်ဆိုင်း

ပြည်တွင်း တပ်ဆင်ထုတ်လုပ်နေတဲ့ နိုင်ငံတကာ ကားကုမ္ပဏီတွေဟာ ပြည်ပကနေ ယာဉ်အပိုပစ္စည်းတွေ သွင်းခွင့်မရတော့တဲ့အတွက် ခု ဇူလိုင်လထဲမှာ သူတို့ရဲ့ ထုတ်လုပ်ရေးလုပ်ငန်း အားလုံးနီးပါးကို ရပ်ဆိုင်းလိုက်ပြီ ဖြစ်ပါတယ်။ ပြည်တွင်းမှာ အမေရိကန်ဒေါ်လာ အကျပ်အတည်းစဖြစ်တဲ့ ဧပြီလကစလို့ စီးပွားရေးနှင့် ကူးသန်းရောင်းဝယ်ရေးဌာနက ကားတင်သွင်း၊ ထုတ်လုပ်ခွင့်ပါမစ်ကို ပိတ်ထားတာပါ။

ရန်ကုန်၊ သီလဝါဆိပ်ကမ်းမှာ တပ်ဆင်ထုတ်လုပ်နေတဲ့ ဂျပန် SUZUKI ကားကုမ္ပဏီဟာ ယာဉ်အပိုပစ္စည်းတွေ တင်သွင်းခွင့်မရတာကြောင့် သူတို့ရဲ့ထုတ်လုပ်ရေးကို ဒီရက်ပိုင်းထဲမှာ ရပ်လိုက်ပါတယ်။ အလားတူပဲ ပြည်တွင်းမှာ အဆင်သင့် တပ် ဆင်ထုတ်လုပ်နေတဲ့ SKD အမျိုးအစား ကားကုမ္ပဏီ ဆယ်ခုလောက်လည်း အလားတူ စိန်ခေါ်မှုတွေနဲ့ ကြုံနေရပြီး အများစုက လုပ်ငန်းရပ်နားလိုက်ပြီလို့ ကားထုတ်လုပ်ရေး လုပ်ငန်းရှင်အသိုင်းအဝန်းက ဗွီအိုအေကို ပြောပါတယ်။

မြန်မာ ရင်းနှီးမြှုပ်နှံမှုကော်မရှင် MIC ဘက်က လုပ်ငန်းလုပ်ခွင့်ပေးထားပေမယ့် အခုနှစ်ဆန်းမှာ သွင်းကုန်လိုင်စင်တွေ ကန့်သတ်မှုကြောင့် အခုလို အခက်အခဲတွေ ကြုံလာရတာလို့ မော်တော်ယာဉ် ထုတ်လုပ်ရေးနှင့် ဖြန့်ဖြူး၊ ရောင်းချရေးအသင်းဥက္ကဋ္ဌ ဦးဇော်ထိုက်အေး က ဗွီအိုအေကို ပြောပါတယ်။

"Brand တွေက နိုင်ငံတကာက Brand တွေဖြစ်တဲ့အခါကျတော့ သူတို့ process အတိုင်း လုပ်ရတာပေါ့။ ပစ္စည်းတခုမှာရင် ၃ လတို့၊ ၆ လတို့ မှာရတဲ့အခါကျတော့ ဒေါ်လာကို သူတို့ဆီက ရရင်တော့ ကျနော်တို့ဒီဘက်က လုပ်ငန်းရှင်တွေကတော့ ဒီဘက် SKD ဆင်မယ့်စက်ရုံတွေကတော့ အဆင်သင့်ပါ။ သူတို့က အရင်အတိုင်း ဆက်ပြီးထုတ်ချင်တာပေါ့။ လက်ရှိ ဒေါ်လာဝယ်မရတာနဲ့ တင်သွင်းခွင့်အားလုံးကို ချိန်ညှိနေရတာနဲ့ဆိုတော့ ကျနော်တို့ SKD ထုတ်လုပ်တဲ့ စက်ရုံတွေမှာရှိတဲ့ သူတို့ရဲ့အလုပ်သမားတွေရဲ့ risk တွေရော စက်ရုံတွေက တာဝန်ယူထားရတာပေါ့။"

ဆူဇူကီး၊ နစ်ဆန်း၊ ဟွန်ဒေး၊ ကီရာ (KIA)၊ Brilliance ၊ Lifan၊ SouEast၊ Ford၊ Yutong၊ FAW၊ Isuzu စသဖြင့် ဂျပန်၊ ကိုရီးယား၊ တရုတ်၊ အမေရိကန် ကားကုမ္ပဏီ ဆယ်ခုကျော်လောက် ပြည်တွင်းမှာ ရင်းနှီးမြှုပ်နှံပြီး လုပ်ကိုင်နေကြတာပါ။ တရုတ် ကုမ္ပဏီတွေကတော့ ၂၀၁၈ နောက်ပိုင်းမှ ပြည်တွင်းကို ဝင်လာတာဖြစ်ပါတယ်။

ဒီကုမ္ပဏီတွေက တဆင့်ပြန်ယူရောင်းချတဲ့ ကိုယ်စားလှယ်တွေလည်း လက်ရှိမှာ သူတို့ရဲ့ အရောင်းစင်တာတွေကို ပိတ်ထားရပါတယ်။ တချို့ကတော့ လက်ကျန်တွေ ဆက်ပြီးရောင်းနေရတယ်လို့ ကားလုပ်ငန်းရှင်တဦးက ဗွီအိုအေကို ပြောပါတယ်။

"SKD ကားတွေက တရုတ်ကား၊ ကိုရီးယားကားဆိုရင် တနှစ်ကိုပျမ်းမျှ အစီး ၅၀၀ ကနေ ၇၀၀ ကြား ရောင်းရတယ်။ ဒီ brand တခုချင်းစီကို။ အခုအချိန်မှာ ကားသစ်တွေဆိုတာက အရင်တပ်ဆင်ပြီးသား လက်ကျန်stock တွေကိုပဲ ဈေးကွက်ထဲကို ပြန်ပို့နေတာ၊ ပြန်ရောင်းနေတာ။ အသစ်ထပ်ပြီး မဝင်တော့ဘူး။ အခုချိန်မှာ ဒီ stock တွေကလည်း ကုန်သွားပြီဆိုတော့ စက်ရုံ တော်တော်များများကတော့ အကုန်ရပ်နားသွားတယ်။"

ပြည်တွင်းတပ်ဆင်ထုတ်လုပ်တဲ့ SKD အမျိုးအစား ဂျပန်၊ တရုတ်၊ ကိုရီးယားကားတွေရဲ့ ရောင်းအားဟာ ၂၀၁၈- ၂၀၁၉ မှာ အမြင့်ဆုံးရောက်ခဲ့ပြီး ယာဉ်အစီးရေ နှစ်သောင်းနီးပါး ထုတ်နိုင်ခဲ့တယ်လို့ ကားထုတ်လုပ်တဲ့ လုပ်ငန်းရှင်တချို့က ဗွီအိုအေကို ပြောပါတယ်။ ၂၀၁၆ ခုနှစ်ကတည်းက ပြည်တွင်းမှာ SKD ကားတွေ စထုတ်ခဲ့တာဖြစ်ပြီး လက်ရှိထိ အစီးရေ ခြောက်သောင်း လောက်ရောင်းချထားပါတယ်။

ဈေးကွက်ထဲမှာ အမေရိကန်တဒေါ်လာကို မြန်မာကျပ်ငွေ ၂,၂၀၀ လောက်ရှိနေပြီး ကားတင်သွင်းတာလည်း မရှိတဲ့အတွက် SKD အမျိုးအစားကားတွေက ယခင်ဈေးထက် ၃၀ ရာခိုင်နှုန်းလောက် ဈေးတက်သွားပါတယ်။ ပြည်ပကတင်သွင်းတဲ့ ကားတွေဆိုရင်တော့ ၈၀ ရာခိုင်နှုန်းလောက်အထိ ဈေးတက်နေပါတယ်။

#MyanmarAutomobileGuide 

Telegram Channel

https://t.me/Guid4U

Source VOA