နေပြည်တော်မှာ ၃ လစာချုပ်နဲ့လုပ်ကိုင်နေတဲ့ အစိုးရကျောင်းကား ယာဉ်မောင်းနဲ့အကူတွေ လစာအပြည့်မရ ဖြစ်နေ

နေပြည်တော် ၇ မြို့နယ်မှာရှိတဲ့ အစိုးရအထက်တန်းကျောင်းတွေအတွက် ၃ လပြတ်စာချုပ်နဲ့ ဝင်ရောက်လုပ်ကိုင်နေတဲ့ ကျောင်းကားမောင်းသူတွေနဲ့ယာဉ်နောက်လိုက်တွေဟာ လစာအပြည့်မရဖြစ်နေတယ်လို့ သိရပါတယ်။

''ဇွန်လ အတွက်ကကတော့ အပြည့်ရတယ်။ ဇူလိုင်လကျတော့ ကျောင်းပိတ်လိုက်တဲ့အတွက် ၈ ရက်စာပဲရတယ်။ ဒီသြဂုတ်လ လစာမပေးတော့ဘူးလို့ သူတို့ကပြောပါတယ်။ အခုကျွန်တော်တို့ တိုင်းပညာရေးရုံးကို ဖုန်းဆက်တော့ အခြေခံပညာရေးရုံး ဘဏ္ဍာရေးဌာနက မပေးတာလို့ ပြောတယ်''လို့ ကျောင်းကားယာဉ်မောင်းတစ်ဦးက ပြောပါတယ်။

နေပြည်တော်မှာ မြို့နယ် ၈ မြို့နယ်အထိရှိပြီး ဇဗ္ဗူသီရီမြို့နယ်မှာ လွန်ခဲ့တဲ့ ၂ နှစ်ကတည်းက အစိုးရကျောင်းကားတွေစီစဉ်ခဲ့လို့ အဲဒီက ကျောင်းကားယာဉ်မောင်းနဲ့ ယာဉ်နောက်လိုက်တွေကတော့ အမြဲတမ်းဝန်ထမ်းတွေ ဖြစ်သွားကြပြီဖြစ်ပါတယ်။

ဒါပေမဲ့ ကျန် ၇ မြို့နယ်မှာတော့ အထက်တန်းကျောင်းတစ်ကျောင်းကို ကျောင်းကား ၂ စီးကျအတွက် ယာဉ်မောင်း ၂ ဦးနဲ့ ယာဉ်အကူ ၂ ဦးစီကို ၃ လပြတ်စာချုပ်နဲ့ စစ်ကောင်စီလက်ထက် ဒီနှစ်ပညာသင်နှစ်မှာ စတင်ခေါ်ယူခဲ့တာဖြစ်ပါတယ်။

အစောပိုင်းတုန်းကတော့ ယာဉ်မောင်းတစ်ဦးကို တစ်လ လစာ ကျပ်ငွေ တစ်သိန်းခွဲ၊ ယာဉ်အကူတစ်ဦးကို တစ်သိန်းနှစ်သောင်းနှုန်းနဲ့ နွေရာသီကျောင်းပိတ်ရက်မပါ ပညာသင်နှစ် ဆုံးတဲ့အချိန်အထိ ၃ လ တစ်ဖြတ်စီ စာချုပ်ချုပ်သွားဖို့ရှိတယ်လို့ သိရပါတယ်။

''စာချုပ်ထဲမှာတော့ ဒီ ၃ လအတွင်းကို ကျွန်တော်တို့က ထွက်လို့လည်းမရဘူး။ တာဝန်ပိုင်းပေါ့လျော့ရင်လည်း ပြန်လျော်ရမယ်လို့ပါတယ်ခင်ဗျ။ ကျွန်တော်တို့ ဒီစာချုပ်ချုပ်ထားတဲ့အတောအတွင်းကို လစာမပေးဘူးဆိုတာတော့ မပါဘူးခင်ဗျ။ ကျွန်တော်တို့က ကျောင်းကို မတက်တာလည်း မဟုတ်ဘူး။ ပြီးတော့ နောက်ဒီ ကိုဗစ်ကြောင့် ပိတ်တဲ့ကိစ္စမှာ ကျွန်တော်တို့က မလုပ်တာလည်း မဟုတ်ဘူးလေ။''လို့ နေပြည်တော်က ကျောင်းကားယာဉ်မောင်းတစ်ဦးကပြောပါတယ်။

၃ လစာချုပ်နဲ့ လုပ်ကိုင်နေတဲ့ယာဉ်မောင်းနဲ့နောက်လိုက်တွေဟာ အမြဲတမ်းဝန်ထမ်းမဟုတ်လို့ လစာမထုတ်ပေးဖို့ အခြေခံပညာဘက်က ညွှန်ကြားထားတယ်ဆိုတာကို နေပြည်တော်တိုင်းပညာရေးမှူးရုံးဝန်ထမ်းရေးရာဘက်က ဘီဘီစီကို အတည်ပြုထားပါတယ်။

စာချုပ်ပါအတိုင်းလစာခံစားခွင့်မရမယ့်အခြေအနေကြောင့် နေပြည်တော်က ကျောင်းကားမောင်းသူတွေနဲ့ယာဉ်အကူတွေဟာ အခုလိုကာလမှာ မိသားစုတွေကို ငဲ့ပြီး ဆန္ဒထွက်ပြဖို့ မရှိပေမဲ့ စုပေါင်းလက်မှတ်ထိုးပြီး နေပြည်တော်ကောင်စီနဲ့တိုင်းပညာရေးမှူးရုံးဆီ တင်ပြဖို့ရှိနေတယ်လို့ သိရပါတယ်။
BBC