ဓာတ်ဆီနဲ့ တခြား စွမ်းအင် ထုတ်ကုန်တွေ ဈေးနှုန်းကြီးမြင့်လာမှုကို ပူးပေါင်းဖြေရှင်းဆောင်ရွက်တဲ့ အနေနဲ့ အမေရိကန်နဲ့ တခြား နိုင်ငံ ၅ ခုတို့က မဟာဗျူဟာမြောက် အရန် ရေနံကို ဓာတ်ဆီနဲ့ တခြား စွမ်းအင်လောင်စာ ထုတ်ကုန်တွေ သန့်စင် ထုတ်လုပ်ဖို့ စီစဉ်နေကြောင်း အင်္ဂါနေ့မှာ ပြောဆိုလိုက်ပါတယ်။
မက္ကဆီကို ပယ်လယ်ကွေ့ တလျှောက် မြေအောက် လိုဏ်တွေမှာ လက်ရှိ ရေနံ စည် ၆၂၁ သန်း သိုလောင်ထားတဲ့ အမေရိကန်ရဲ့ မဟာဗျူဟာမြောက် အရန် ရေနံထဲက ရေနံစည် သန်း ၅၀ ကို လာမယ့် ၂၀၂၂ ခုနှစ် ဧပြီလ အထိ ရေနံချက်သူတွေကို ရောင်းချမယ့် အကြောင်း အမေရိကန် သမ္မတ အိမ်ဖြူတော်က ပြောပါတယ်။ စက်သုံးဆီ ဈေးကြီးမှုက တကမ္ဘာလုံး အတွက် အခက်အခဲ ဖြစ်ရတယ်လို့ သမ္မတ Joe Biden က ပြောပါတယ်။
စက်သုံးဆီ ဈေးကြီးမှုက အမေရိကန် အတွက်တင် မဟုတ်ဘဲ ကကမ္ဘာတလွှား အတွက် ပြသနာ တခုဖြစ်ပါတယ်။ ဥရောပမှာ အာရှမှာ ဓာတ်ဆီဈေးနှုန်းတွေ စံချိန်တင် ရောက်ရှိခဲ့ပါတယ်။ ပြီးခဲ့တဲ့ လကုန်မှာ ပြင်သစ်မှာ ဓာတ်ဆီ တဂါလံ ၇ ဒေါ်လာလောက် ဖြစ်ခဲ့ပါတယ်။ ဂျပန်မှာ တဂါလံကို ၅ ဒေါ်လာခွဲ ဖြစ်ပြီး ဒီနှစ်ပိုင်းတွေ အတွင်း အမြင့်ဆုံး ဈေးနှုန်း ဖြစ်ပါတယ်လို့ အမေရိကန် သမ္မတက ပြောပါတယ်။
အမေရိကန်မှာ ဓာတ်ဆီ တဂါလံ ပျမ်းမျှ ဈေးနှုန်းက ၃ ဒေါ်လာ ၄၀ ဆင့်လောက် ရှိပြီး ဒါဟာဆိုရင် ၂၀၁၄ ခုနှစ်နောက်ပိုင်း အမြင့်ဆုံး ဈေးနှုန်း ဖြစ်ပါတယ်။ အခု အမေရိကန်ရဲ့ အရန် ရေနံကို လာမယ့် လပိုင်းတွေ အတွင်း ဖြန့်ဝေမှုကလည်း အခု ပေးနေရတဲ့ ဈေးနဲ့ အများကြီး လျော့မသွားနိုင်ပါဘူး။
တခြား ၅ နိုင်ငံ ဖြစ်တဲ့ တရုတ်၊ ဂျပန်၊ တောင်ကိုရီးယား၊ အိန္ဒိယနဲ့ ဗြိတိန်နိုင်ငံတို့ဘက်က သူတို့ရဲ့ အရန် ရေနံထဲက နေ ဘယ်လောက် ဖြန့်ဝေမယ်ဆိုတာ မသိရတာကြောင့် စက်သုံးဆီ ဈေးနှုန်း ဘယ်လောက် လျှော့ချနိုင်မလဲ ဆိုတာကိုတော့ အခု ချက်ချင်း တွက်ချက်ဖို့ မရနိုင်သေးပါဘူး။
ဗီအိုအေ
Sign In with Google