ဗြိတိန်-ဂျပန် လွတ်လပ်သော ကုန်သွယ်ရေးသဘောတူညီချက် ချုပ်ဆို

ဂျပန်နဲ့ ဗြိတိန်နိုင်ငံတို့ဟာ သမိုင်းဝင် လွတ်လပ်တဲ့ ကုန်သွယ်ရေး သဘောတူစာချုပ်ကို သောကြာနေ့က လက်မှတ်ထိုးလိုက်ကြပါတယ်။

ဒါဟာ ဥရောပသမဂ္ဂထဲက ဗြိတိန်နိုင်ငံ နုတ်ထွက်ခဲ့ပြီးနောက်ပိုင်း ပထမဦးဆုံး ချုပ်ဆိုလိုက်တဲ့ အရေးပါဆုံးစာချုပ်လည်း ဖြစ်ပါတယ်။

ဒီစာချုပ်အရ ဗြိတိန်က ဂျပန်ကို သွင်းနေတဲ့ Yorkshire သိုးသားတွေအပေါ် အခွန်အတုပ် လျှော့ချပေးမှာ ဖြစ်သလို ဂျပန် Nissan ကားစက်ရုံထုတ် ကားအပိုပစ္စည်းနဲ့ ပတ်သက်တဲ့ အခွန်တွေကိုလည်း လျှော့ချသွားရေးအပြင် အခြားကုန်ပစ္စည်းတွေပေါ် အခွန်လျှော့ချသွားမှာ ဖြစ်ပါတယ်။

ဗြိတိန်လုပ် ကုတ်အင်္ကျီ၊ ရှူးဖိနပ်နဲ့ Stilton cheese တွေ၊ ဘီစကစ်တွေ၊ ဗြိတိန်ဝက်သားတွေ ဂျပန်မှာ ဈေးချိုချိုနဲ့ ဝယ်စားနိုင်တော့မှာပါ။

ဗြိတိန်-ဂျပန် ကုန်သွယ်ရေး သဘောတူစာချုပ်သစ် ချုပ်ဆိုပွဲကိုတော့ တိုကျိုမြို့မှာ ပြုလုပ်ခဲ့ပြီး ဗြိတိန် နိုင်ငံတကာကုန်သွယ်ရေးဝန်ကြီး Liz Truss နဲ့ ဂျပန်နိုင်ငံခြားရေးဝန်ကြီး Toshimitsu Motegi တို့ တက်ရောက် လက်မှတ်ထိုးခဲ့ကြတာပါ။

ဒီကုန်သွယ်ရေး သဘောတူညီချက်အရ ဂျပန်-ဗြိတိန် နှစ်နိုင်ငံကြား ကုန်သွယ်မှုပမာဏ အမေရိကန်ဒေါ်လာ ၁၉.၅ ဘီလျံဖိုးအထိ မြင့်တက်လာဖွယ်ရှိတယ်လို့ မျှော်လင့်ထားပါတယ်။ ဗြိတိန်က အခုလို ဂျပန်နဲ့ ကုန်သွယ်ရေး မြှင့်တင်လိုက်တယ် ဆိုပေမယ့်လည်း ဗြိတိန်ဟာ EU ဥရောပသမဂ္ဂကနေ နုတ်ထွက်ခဲ့လို့ နစ်နာသွားရတဲ့ ကုန်သွယ်ရေးပမာဏကို ပြန်မီဖို့ကတော့ အလှမ်းကွာဝေးနေဆဲ ဖြစ်ပါတယ်။

ဗြိတိန်နိုင်ငံဟာ အခြားနိုင်ငံတွေနဲ့လည်း ကုန်သွယ်ရေး သဘောတူချက်ရဖို့ ကြိုးပမ်းနေပြီး အထူးသဖြင့် အမေရကန်ပြည်ထောင်စုနဲ့ သဘောတူညီမှုရဖို့ ကြိုးပမ်းနေပေမယ့် နှစ်နိုင်ငံကြား ဆွေးနွေးမှုတွေ ရှေ့မတိုးနိုင်သေးဘဲ ကြန့်ကြာနေပါတယ်။