တူရကီ ပထမဆုံး အီးဗီ SUV  ဈေးသက်သာမည်ဟု စီအီးအို ပြောကြား

တူရကီ ပထမဆုံး အီးဗီ SUV  ဈေးသက်သာမည်ဟု စီအီးအို ပြောကြား

TO GET INSTANT UPDATE 
Join Telegram Channel
https://t.me/Guid4U

တူရကီနိုင်ငံ၏  ပြည်တွင်း၌ ပထမဆုံး ထုတ်လုပ်သော လျှပ်စစ်ကားအမှတ်တံဆိပ် Togg  သည် ၂၀၂၃  ခုနှစ် နှစ်ဆန်းပိုင်း လများတွင် လမ်းများပေါ် ရောက်ရှိလာမည်ဖြစ်သည်။ အီးဗီပြိုင်ဘက်များနှင့် နှိုင်းယှဉ်ပါက ဈေးနှုန်း ချိုသာလိမ့်မည်ဖြစ်ပြီး ဓာတ်ဆီအင်ဂျင်ကားများထက်ပင်လျှင် ဈေးသက်သာလိမ့်မည်ဖြစ်ကြောင်း အမှုဆောင်အရာရှိချုပ် Gürcan Karakaş  က သောကြာနေ့(ဒီဇင်ဘာ ၉)တွင် ပြောကြားခဲ့သည်။
သို့သော် ပထမဆုံး ထုတ်လုပ်မည့် SUV  မော်ဒယ်အတွက် ဈေးနှုန်းများကို ၂၀၂၃ ခုနှစ် ဖေဖော်ဝါရီလကျမှ တရားဝင် ထုတ်ပြန်ကြေညာမည်ဟု ဆိုသည်။ 
ကြိုတင်အမှာစာများကိုလည်း ၂၀၂၃ ခုနှစ် ဖေဖော်ဝါရီလကျမှ စတင်လက်ခံမည် ဖြစ်သည်။ 

Togg လျှပ်စစ်ကားကို တူရကီမှ ကုမ္ပဏီစုကြီး ၅ ခုတို့ ပူးပေါင်းပြီး Automobile Initiative Group of Türkiye -Togg ကို ထူထောင်ပြီး ထုတ်လုပ်ကြသည်။ Union of Chambers and Commodity Exchanges of Türkiye (TOBB) က ပူးပေါင်းဆောင်ရွက်ပေးသည်။ 

၁၅ နှစ်တာ ကာလတစ်လျှောက် ယူရို ၃.၅ ဘီလီယံ (ကန်ဒေါ်လာ ၃.၆ ဘီလီယံ) ရင်းနှီးမြှုပ်နှံသွားမည် ဖြစ်ပြီး ယူရို ၁.၈ ဘီလီယံဝန်းကျင်ကို ၂၀၂၃ ခုနှစ် နှစ်ကုန်ပိုင်း မတိုင်ခင် ရင်းနှီးမြှုပ်နှံသွားမည် ဖြစ်သည်။ 

Togg သည် SUV အပြင် နောက်ထပ် မော်ဒယ် ၄ ခု ဖြစ်သော ဆီဒင် မော်ဒယ်၊ C-hatchback မော်ဒယ်၊ B-SUV မော်ဒယ်၊ B-MPV မော်ဒယ်တို့ကို ၂၀၃၀ မတိုင်ခင် ထုတ်လုပ်သွားမည် ဖြစ်သည်။ SUV  မော်ဒယ် ထုတ်လုပ်မှု အသားကျသွားသည့်အခါ ဆီဒင်မော်ဒယ်ကို အမြောက်အမြား ဆက်လက်ထုတ်လုပ်မည် ဖြစ်သည်။ 

၂၀၃၀ မတိုင်ခင်တွင် မော်ဒယ်အမျိုးမျိုး စုစုပေါင်း စီးရေ ၁ သန်း ထုတ်လုပ်ရန် ရည်မှန်းထားသည်။ ၂၀၃၅ မတိုင်ခင်တွင် မော်ဒယ်အချို့ စီးရေ ၃၀,၀၀၀ ကို အစိုးရထံ ရောင်းချမည် ဖြစ်သည်။ 
လက်ရှိအနေအထားတွင် တစ်နှစ်လျှင် စီးရေ ၁ သိန်းဝန်းကျင် ထုတ်လုပ်နိုင်သည်။ စက်ရုံ အသားကျပြီး စွမ်းအားပြည့် လည်ပတ်သည့်အခါ စီးရေ ၁၇၅,၀၀၀ အထိ ထုတ်လုပ်နိုင်လိမ့်မည်ဟု Karakaş က ပြောကြားသည်။ 

 ဧရိယာ ၁.၂ သန်း စတုရန်းမီတာပေါ်တွင် ထုတ်လုပ်မှု လုပ်ငန်းစဉ် အဆင့်ဆင့်၏ ၉၀ ရာခိုင်နှုန်းကို အလိုအလျောက်စနစ်များဖြင့် လုပ်ကိုင်သည့် စက်ရုံကို တည်ဆောက်ထားသည်။ စွမ်းအားပြည့် လည်ပတ်သည့်အခါ ၃ မိနစ် ၁ စီးကျ ထုတ်လုပ်ပေးနိုင်မည်ဟု Karakaş က ပြောကြားသည်။ 

Togg ပထမဆုံး မော်ဒယ်  SUV တွင် တူရကီ ပြည်တွင်းဖြစ် ပစ္စည်းများ တန်ဖိုးအားဖြင့် ၅၁ ရာခိုင်နှုန်း ပါဝင်သည်။ လာမည့် ၃ နှစ်အတွင်း ၎င်းရာခိုင်နှုန်းသည် ၆၈ ရာခိုင်နှုန်းဖြစ်လာမည်ဟု Karakaş က ပြောကြားသည်။ 
ယာဉ်အတွက် ပစ္စည်းပေးသွင်းသူများတွင ၇၅ ရာခိုင်နှုန်းသည် တူရကီ နိုင်ငံတွင်းရှိ လုပ်ငန်းများ ဖြစ်သည်။ 

၂၀၂၃ တွင် အမှာစာများ လက်ခံသောအခ ပထမအသုတ်တွင် စီးရေ ၂၀,၀၀၀ ပေးအပ်မည် ဖြစ်သည်။

ပြည်တွင်းမှာ ၁၈ လ ရောင်းချပြီးမှ ပြည်ပတင်ပို့မှု စတင်မည်ဖြစ်ပြီး ဥရောပနိုင်ငံများတွင် ပြည်တွင်းလုပ်ငန်းနှင့် ဖက်စပ်လုပ်ငန်း ထူထောင်ပြီး ၎င်းဖက်စပ်လုပ်ငန်းများက အီးဗီများကို ရောင်းချပေးမည် ဖြစ်သည်။ 

ကားကို Ferrari အိမ်စီးပြိုင်ကား ဒီဇိုင်း ထုတ်လုပ်သည့် အီတလီဒီဇိုင်းလုပ်ငန်း Pininfarina က ဒီဇိုင်းထုတ်ပေးထားသည်။ 

ဘက်ထရီအတွက် Togg ကားစက်ရုံအနီးတွင် Farasis က ဘက်ထရီစက်ရုံ ထားရှိပြီး ထုတ်လုပ်ပေးမည် ဖြစ်သည်။ 

တူရကီနိုင်ငံတွင် အားသွင်းကွန်ရက်ကို brand အမည် Trugo ဖြင့် စတင်ထူထောင်နေသည်။ ပြည်နယ် ၈၁ ခုတွင် အားသွင်းရုံ ခုရေ ၆၀၀ အဆင်သင့် ရှိနေစေမည် ဖြစ်သည်။  မြို့တွင်း မြို့ပြင် နေရာများအပြင် အဝေးပြေးလမ်းမများတွင်လည်း အားသွင်းရုံများ ထားရှိပေးထားမည် ဖြစ်သည်။ 

Source dailysabah